بعض الملاحظات الهامة فى استلام اعمال بلاط (سيراميك) الحوائط
طبعا اهم شئ قبل اى حاجه انك قبل ما تطلب السيراميك او البلاط تعمل حصر طبقا للرسمة الى هنعملها وتوفقها على الارتفاع والعرض على الطبيعة يعنى كام صف غامق وفاتح وهندسى والستلو وعدد وأماكن بلاطات الديكور.
استلام السيراميك والبلاط نفسه
١- تفتيح الكراتين والتاكد من درجه الفرز من الكرتونة ونقض البلاطات المختلفة فى التون (tone) والى بيكون وارد الحدوث لو سيراميك مش فرز اول.
٢- نقض او تجنب البلاطات المشطوفه اوالمشروخة او المكسورة نتيجة التشوين علشان نشغلها فى الغلايق اما لو وقبل التشوين وهنستلم يبقى المكسور والشطف يرجع للمورد.٣- نقع او تبلل البلاطات فى برميل مياة عشان تشرب الطفلة الى في ضهر البلاطة و ماتشربش مياة من مونة التركيب بعدها.
٤-التاكد من ان السيراميك الموجود كافى للمساحة الى هنشتغل عليها طبقا لرسمة ال shop drawing .
٥-لو مفيش لوحة لرسم السيراميك يبقى هنشتغل طبقا للتوزيع الى احنا حسبنا السيراميك على اساسة كام صف غامق وكام صف هندسى وكام صف فاتح ومكان الستلو وهكذا وبنجربهم على الطبيعه ونتاكد منهم.
استلام التركيب لبلاط الحوائط
١- استلام الخيوط الرأسية ( السواعى ) قبل البدأ فى التركيب.٢-منسوب اول بلاطه تركيب من تحت انها هتحقق الرسمه وانها بدايتها من تحت اوطى من الشيرب على الاقل ٣ سم علشان يقفل عليها سيراميك الارضية وانها هتصحح بلاطه سليمه فوق وميبقاش غلايق فوق وتحت .
٣- راسية الجنب نفسه بميزان المياه بشكل مستمر اثناء التركيب
٤- استلام التقاء الزوايا اما بالشطف او بتركيب زاويه خارجيه ( حليه ) واستلام راسية التقابل .
٥-استلام الزاوية افقيا بين كل جنبين متقابلين وكذلك توازى كل جنبين متوازين ( استرباع بالمتر )
٦- استلام تعريض الاعمدة بعد التركيب.
٧- استلام زاوية الاعمدة مع الجنب .
٨-استلام زاوية بطنية الكمر السفلية مع الجنب .
٩- استلام اخر بلاطتين بميزان المياة لانه بيركبهم بعد ميكون شال الخوابير الى كان رابط فيها السواعى .
١٠-استلام التطبيل وده عن طريق الدق على البلاطة وسماع الصوت يجب ان يكون مكتوم اما لو مفتوح يبقى البلاطة ضهرها فاضى وهتطبل .
١١- استلام استمرارية والتقاء الفواصل انها تبقى متساوية ومستمرة ( يفضل استخدام صلايب لظبط العراميس ).
١٢- استلام التسنين بين البلاطات ان مايكونش فى بلاطه بارزه عن غيرها وده بنى بعدى عصاية خشب على البلاطات وهيبان اذا كان فى جزء بارز او لا
استلام بعد التركيب :
١-استلام تفتيح العاميس بفرشاه سلك فى نفس يوم التركيب.٢- استلام السقية فى تانى يوم بعد التركيب والاهم فى اليوم التالى للسقية كمان علشان لو حصل انكماش فى السقية يتعاد عليها
٣- لو هتعمل سقية ملونة اشتريها جاهزة ماتخلطش الوان على الاسمنت الأبيض علشان لونها هيغير تانى يوم وكمان لو حبيت تعيد على جزء منها ممكن يطلع مختلف فى اللون.
طبعا لو التركيب بماد لاصقة مش بلدى مش بيبقى فى خيطان بيبقى الاعتماد الكلى على طبقة البياض نفسها انها تكون معمولة على بؤج واوتار راسية واستلام استرباع وزاويه طبقة البياض نفسها
التركيب بمادة لاصقة بيكون اجبارى لو حجم البلاطة كبير ٦٠ × ٦٠ مثلا او ٣٠× ٩٠ او لون البلاطة نفسها قابل انه يتغير لو شرب من المونه وبيبقى مكتوب على الكرتونة انه لازم يركب بمادة لاصقة دى بعض الملاحظات
تحميل مذكرة السيراميك من كورس التشطيبات للمهندس وائل عبد المنعم
تحميل مذكرة السيراميك من كورس التشطيبات
يوجد ايضاً العديد من الطرق لاستلامات البلاط والسيراميك حسب المواصفات وجودة الشغل
م_وائل عبد المنعم